തിരുവനന്തപുരം : നാടിനെ ഇരുണ്ടകാലത്തിലേക്കു ചവിട്ടിത്താഴ്ത്തുന്ന വര്ഗീയ ഫാസിസ്റ്റു കോമരങ്ങള്ക്കെതിരെ കലയിലൂടെ കലാപക്കൊടി ഉയര്ത്തി പുരോഗമന കലാസാഹിത്യസംഘത്തിന്റെ തെരുവുനാടകം 'കാണ്ടാമൃഗങ്ങള്'. ഭരണകൂടത്തെയും അതിന്റെ കാവല്നായ്ക്കളെയും തെരുവില് കലകൊണ്ട് നേരിട്ട് രക്തസാക്ഷിത്വംവരിച്ച സഫ്ദര് ഹശ്മിയുടെ സ്മരണ പുതുക്കാന് പുരോഗമന കലാസാഹിത്യസംഘം ജില്ലാ കമ്മിറ്റിയാണ് തെരുവുനാടകത്തിലൂടെ സാംസ്കാരിക പോരാട്ടത്തിന്റെ പുതിയ പോര്മുഖംതുറന്നത്. സഫ്ദര് ഹശ്മി ദിനം പോരാട്ട നാടക ദിനമായാണ് പുരോഗമന കലാസാഹിത്യസംഘം ആചരിക്കുന്നത്. ഇതിന്റെ ഭാഗമായിട്ടായിരുന്നു 'കാണ്ടാമൃഗങ്ങള്' അരങ്ങിലെത്തിച്ചത്.
ജനകീയ നാടകപ്രവര്ത്തകന് ശ്യാം റജിയുടെ സംവിധാനത്തില് പാളയത്ത് യൂണിവേഴ്സിറ്റി കോളേജിനുമുന്നിലാണ് 'കാണ്ടാമൃഗങ്ങള്' അരങ്ങേറ്റംകുറിച്ചത്. ലോകപ്രശസ്ത നാടകകൃത്ത് യൂജീന് അയനസ്കൊയുടെ കൃതിയുടെ സ്വതന്ത്രാവിഷ്കാരമായാണ് നാടകം അരങ്ങിലെത്തിച്ചത്. ജനങ്ങളെ ചൂഷണം ചെയ്തും ഭിന്നിപ്പിച്ചും അടിച്ചമര്ത്തിയും ജീവിക്കുന്ന കാണ്ടാമൃഗങ്ങളായ ഭരണാധികാരിവര്ഗത്തെയും അതിന്റെ പിണിയാളുകളെയും തെരുവില് തൊലിയുരിച്ചുകാണിക്കുകയാണ് നാടകത്തില്. അഭിനേതാക്കളും കാണികളുമായി അതിരുകളൊന്നുമില്ലാതെ സംവദിച്ച നാടകം നിറഞ്ഞ കൈയടിയോടെയാണ് സ്വീകരിക്കപ്പെട്ടത്.
സംവിധായകന് ശ്യാം റജി, കവി വി എസ് ബിന്ദു, വിദ്യാര്ഥികളായ കെ എസ് വിശാഖ്, കാര്ത്തിക് സുരേന്ദ്രന്, നിതിന് രാജ് ആനാവൂര് എന്നിവര് അരങ്ങിലെത്തിയപ്പോള് അരവിന്ദ്, ശംഭു, ആനന്ദ് വി എസ് തമ്പി എന്നീ വിദ്യാര്ഥികള് സംഗീതമൊരുക്കി. തുടര്ന്നുള്ള ദിവസങ്ങളില് ജില്ലയുടെ വിവിധ ഭാഗങ്ങളില് നാടകം അവതരിപ്പിക്കുമെന്ന് പുരോഗമന കലാസാഹിത്യസംഘം ജില്ലാസെക്രട്ടറി വിനോദ് വൈശാഖി പറഞ്ഞു.
No comments:
Post a Comment